ទោះបីជាមេដឹកនាំគ្រួសារដែលជាមេគំនិត បានធ្វើអត្តឃាតក្នុងពេលព័ទ្ធចាប់ខ្លួនហើយក៏ដោយ តុលាការចិនទីក្រុង Wenzhou ទើបបានកាត់ទោសគ្រួសារត្រកូល ម៉េង (Ming) ដែលជាម្ចាស់មជ្ឈមណ្ឌលឆបោកដ៏ធំនៅមីយ៉ាន់ម៉ា ដោយតុលាការបានកាត់ទោសលើសមាជិកគ្រួសារចំនួន ៣៩នាក់ ហើយក្នុងនោះមាន ១១នាក់ត្រូវបានកាត់ទោសប្រហារជីវិត។ ការកាត់ទោសលើគ្រួសារសេដ្ឋីដ៏ល្បីមួយនៅព្រំដែនចិន-មីយ៉ាន់ម៉ានេះ គឺដោយសារពួកគេពាក់ព័ន្ធនឹងអាជីវកម្មរកស៊ីខុសច្បាប់ រួមមានការបើកបនល្បែងស៊ីសង រត់ពន្ធគ្រឿងញៀន និងបើកមជ្ឈមណ្ឌលឆបោកក្នុងប្រទេសមីយ៉ាន់ម៉ា។ នេះបើតាមការផ្សាយរបស់ប្រព័ន្ធផ្សព្វផ្សាយរដ្ឋរបស់ចិន CCTV។

គួររំលឹកថា មុនពេលឈានដល់ការកាត់ទោសលើសមាជិកគ្រួសារទាំង ៣៩នាក់នៃគ្រួសារខាងលើនៅចុងខែកញ្ញា ឆ្នាំ២០២៥នេះ ដំបូងឡើយពួកគេត្រូវបានមីយ៉ាន់ម៉ាសហការបង្ក្រាបកាលពីឆ្នាំ២០២៣ ក្រោមការជំរុញពីទីក្រុងប៉េកាំង រួចមីយ៉ាន់ម៉ាបានប្រគល់ពួកគេទៅឲ្យអាជ្ញាធរចិនដើម្បីស៊ើបអង្កេតស៊ីជ្រៅ រហូតឈានដល់ការកាត់ទោសសមាជិកគ្រួសាររាប់សិបនាក់ដូច្នេះ។ 

គ្រួសារម៉េងនេះ គឺជាគ្រួសារមួយនៃគ្រួសារអ្នកជំនួញធំទាំង៤នៅទីក្រុង Laukkai ប្រទេសមីយ៉ាន់ម៉ា ជាប់ព្រំដែនចិន ដែលជាទីក្រុងល្បីល្បាញខាងមជ្ឈមណ្ឌលល្បែងស៊ីសងអនឡាញខុសច្បាប់ គ្រឿងញៀន និងមជ្ឈមណ្ឌលបោកប្រាស់។ បន្ថែមពីនេះ តុលាការក៏បានរកឃើញថាគ្រួសារ ម៉េង និងក្រុមឧក្រិដ្ឋជនផ្សេងទៀត គឺជាអ្នកទទួលខុសត្រូវចំពោះការស្លាប់របស់កម្មករមជ្ឈមណ្ឌលឆបោកជាច្រើននាក់ រួមទាំងការបាញ់សម្លាប់ជនរងគ្រោះជនជាតិចិនដូចគ្នា នៅពេលពួកគេព្យាយាមរត់គេចចេញពីទីតាំងបង្ខាំងមនុស្សទាំងនោះផងដែរ។

ក្នុងចំណោមសមាជិកទាំង ៣៩នាក់ មាន​សមាជិកគ្រួសារម៉េងចំនួន ១១នាក់​ត្រូវបានកាត់ទោស​ប្រហារ​ជីវិត មាន ៥នាក់​ផ្សេង​ទៀត​បាន​ទទួល​ទោស​ប្រហារ​ជីវិត​ដោយ​ព្យួរ​ទោសរយៈពេល ២ឆ្នាំ ១១នាក់ជាប់គុកអស់មួយជីវិត ហើយ​អ្នក​នៅ​សល់ចំនួន១២នាក់ទៀត ​ត្រូវ​បាន​កាត់​ទោស​ដាក់​ពន្ធនាគារ​រយៈពេលពី ៥ ទៅ ២៤ ឆ្នាំ។

តុលាការចិនបានរកឃើញថា គិតចាប់ពីឆ្នាំ២០១៥ មក គ្រួសារ ម៉េង និងក្រុមឧក្រិដ្ឋជនពាក់ព័ន្ធផ្សេងទៀតបានធ្វើសកម្មភាពឧក្រិដ្ឋកម្ម រួមមានការក្លែងបន្លំតាមប្រព័ន្ធទូរគមនាគមន៍ បើកកាស៊ីណូខុសច្បាប់ ការជួញដូរគ្រឿងញៀន និងពេស្យាចារ។ តុលាការចិនបានសន្មត់ថា សកម្មភាពបើកកន្លែងលេងល្បែងស៊ីសង និងបោកប្រាស់របស់គ្រួសារត្រកូលម៉េង រកចំណូលបានជាង ១០ពាន់លានយន់ ស្មើប្រហែល ១៤០០លានដុល្លារអាមេរិក។ ប៉ុន្តែចំពោះការវាយតម្លៃក្រៅតុលាការ គេធ្លាប់បានវាយតម្លៃថា គ្រួសារនេះរកចំណូលបានច្រើនពាន់លានដុល្លារក្នុងមួយឆ្នាំ ពីកាស៊ីណូនៅក្រៅប្រទេសរបស់ពួកគេ។

សូមជម្រាបថា គ្រួសារ ម៉េង ធ្លាប់ជាគ្រួសារដ៏មានអំណាចមួយនៅក្នុងរដ្ឋ Shan ប្រទេសមីយ៉ាន់ម៉ា និងជាម្ចាស់មជ្ឈមណ្ឌលឆបោកជាច្រើនទីតាំងនៅទីក្រុង Laukkai ដែលមានកម្មកររងគ្រោះយ៉ាងតិច ១ម៉ឺននាក់។ មាន​កម្មករ​ជាច្រើនត្រូវ​បាន​គេ​វាយដំ និង​ធ្វើ​ទារុណកម្ម​ជា​ប្រចាំនៅតំបន់ស្ថិតក្រោមការគ្រប់គ្រងរបស់គ្រួសារម៉េង ដែលបានបង្ខិតបង្ខំឲ្យធ្វើការឆបោកតាមប្រព័ន្ធអនឡាញ។ ប៉ុន្តែអំណាចរបស់គ្រួសារនេះបានឈានដល់ទីបញ្ចប់នៅចុងឆ្នាំ២០២៣ បន្ទាប់ពីកងទ័ពបះបោរបានបើកការវាយលុក បណ្តេញក្រុមយោធាចេញពីតំបន់ធំៗនៃរដ្ឋ Shan រួមទាំងបានដណ្ដើមកាន់កាប់ទីក្រុង Laukkai។ ភ្លាមៗរដ្ឋាភិបាលទីក្រុងប៉េកាំងដែលជាអ្នកមានឥទ្ធិពលលើទាំងក្រុមយោធា និងក្រុមទ័ពបះបោរ បានបើកភ្លើងខៀវឲ្យបង្ក្រាបលើគ្រួសារសេដ្ឋីម៉ាហ្វីយ៉ាចិនទាំងនោះ។ 

មេដឹកនាំគ្រួសារម៉េង គឺលោក Ming Xuechang ត្រូវបានគេរាយការណ៍ថា បានបាញ់សម្លាប់ខ្លួនក្នុងខែវិច្ចិការឆ្នាំ២០២៣ នៅទីក្រុង Laukkai នៅពេលដឹងខ្លួនថាមិនអាចគេចផុតពីការតាមចាប់ខ្លួន។ ប៉ុន្តែកូនប្រុស និងសមាជិកគ្រួសារផ្សេងទៀតរបស់គាត់ ត្រូវបានចាប់ខ្លួន រួចប្រគល់ឱ្យអាជ្ញាធរចិន។ យ៉ាងណា ទោះជាមេដឹកនាំគ្រួសារ លោក Ming Xuechang បានស្លាប់ទៅហើយក្ដី ក៏កូន និងចៅៗរបស់មេក្លោងមជ្ឈមណ្ឌលឆបោករូបនេះ សរុប ៣៩នាក់ នៅតែត្រូវបានកាត់ទោសប្រហារជីវិត និងឃុំខ្លួនដដែល៕